【殘忍的單戀非你專利】一個暗戀十年的故事。
大家好，
小弟姓曹，名子建，土生香港人，今年廿八。
這夜，很希望跟大家分享一個小故事，
是小弟跟一位「朋友」的十年故事。
「朋友……」
雖然我不喜歡這個稱呼。
要介紹的話，就叫她 Katrina，
對，她是陶吉吉的 Katrina，
也是陳奕迅的 Katrina。
陈医生 - KATRINA
說到底，
我們人生裡頭總有一位 Katrina，
而她，就是我的 Karina。
當下要跟大家分享，
是因為這個晚上我的心情快要爆標，
或許在最後一口前把一切寫出來，
只希望心情能夠好起來。
或許寫得不好，希望各位體諒，
也望得有緣人支持。
1. 初遇
Katrina 是我中學同學的前女友，
第一次見面是中六那年，
下課後到同學家打Winning，
在激烈的賽事途中，
有一位身材高挑，長長秀髮、皮膚嫩白的女生從朋友房間走出來，
當時她像天使一樣身後氾起一道聖光，漂亮得很。
「佢係子健，叫人啦！」同學霸氣命令。
「子健。」天使的聲音甜美，帶有一點爛漫。
「嗨……妳…妳係………」當時心情十分緊張。
「Katrina，我條女。」同學以一個錯誤的量詞簡介。
「家勤，我想飲水呀！」家勤是我的同學。
「你見唔到我地進行緊國家大事既咩？自己入廚房斟啦！」
「唔……不過廚房冇水喎……」
「唉……女人真係……妳響我褲袋拎個銀包落街買啦……」
「哦……好啦……」Katrina 扁著咀。
「喂！唔好摷錯呀！依抽係荔枝黎架！」
第一次跟 Katrina 初遇，
就是她把右手伸進家勤的左邊褲袋「摷野」
我心不其然的想，
除了當我離開以後，
家勤便立即把 Katrina 拉進房粗暴地大肆搶掠之外，
這樣漂亮的女生不應該如此疏忽對待……。
2. 墮落天使
自那天起，我不時想起她。
心裡萌生一份情感，
繪了一幅憧憬圖。
上堂時看著窗外的白雲，
不知聖保羅女校那邊的情況？
穿起格仔校裙的她在做什麼？
下課後想找家勤一起到網吧打CS，
豈料他原來一早就逃課走了……
「喂……你響邊呀？」
「番左屋企啦！」
「咁早番去做乜？出黎打機啦！」
「梗係番黎Happy啦！」
「Happy？」
「難得屋企冇人，梗係帶條女番黎砌啦！」
「呃……唔…咁仲出…出唔出唔出黎打…打機呀…」
「等佢訓醒再執多劑先啦！」
「好啦…拜……」
掛線後，
想到一條毛茸茸的肉蟲已把我的天使摧毀。
心裡還不停響起她的聲音「唔…唔…唔唔…冇水喎……」
我只聽過 Katrina 說過這幾個字，
然後不停重組和重複的使用在刺痛的幻想裡。
3. 感冒腸入菌
家勤跟 Katrina 交往半年，
間中，Katrina 會來修頓球場看球賽。
只要她一在場邊，
我就無法集中精神，
全程心不在焉，
本來盯著籃框的焦點，
眼白會不自控地射到場外，
本來看守著對手的注意力，
會被白色恤衫格仔裙的顏色分散。
「喂！做乜回哂塘架？」家勤喝著佳得樂說。
「今日…有D唔舒服…」
「唔舒服就番去訓啦，仲打波！」
「籃球係我既朋友丫嘛……」
實情是我是知道今天 Katrina 會來看家勤打球。
其實除了集中力被分散令表現失準外，
第二天還請了病假。
醫生說我感冒腸入菌，
病情還不輕，
怎麼還去做劇烈運動？
他皺著眉給我訓話。
或許 Katrina 的可愛臉蛋猶如止痛藥，
看見她，連肚裡的痛楚也忘了。
對了，
醫生大概說錯了，
是感冒菌入腸對吧？
4. 矛盾
家勤是我最好的朋友，
其早熟為他中學時代帶來無限機會。
對比起，
條件比我實在優勝得多。
家境富裕、
風趣幽默、
豪邁不覊，
運動細胞豐富、
聰明之餘，
中學時已有一份霸氣。
男的既欣賞又葡萄，
女的也受不了他的咀頭，
聞說學校的女同學，
稍為漂亮也給他幹了，
Katrina 是創他職業生涯最長交往時間的女生。
我問過他為何是次如此長情，
他爽快直接回了一句：「好砌嘛！」
家勤是我最好的朋友，
卻永遠在不知不覺間傷害我的深處，
他對 Katrina 的輕視如利刀一樣刺我心，
這種失落漸漸形成了一種矛盾，
一方面希望他們分手，
另一方面會自責自己心腸壞，
再另一方面會給自己借口說，
Katrina 離開家勤才有真正的幸福……
然而，Katrina 就是很喜歡家勤。
5.承諾
「我失戀喇！」一個下午，家勤跟我在小艇釣魚時說。
「下…你失戀…即係…話你同……」心腸壞的我暗喜。
「我同 Katrina 玩完喇！」他點起一根煙。
「點……點解既？」心腸壞的我暗喜，咀邊微微向上彎。
「響ICQ識左個美國華僑，我要等佢番黎！」
「幾……幾時返呀咁？」心腸壞的我暗喜。
「下個月返黎放暑假！」他目光放到最遠，一臉猥瑣。
「咁 Katrina 佢點…呀？」心腸壞的我開始擔憂。
「佢以為我講笑……講極都唔明！」
「下……咁好大獲喎…」
「最怕佢真係接受左之後會做傻事……」
「唔會掛？佢咁天真爛漫，冇事既……」
「佢D Friend一知佢甩拖一定帶佢落老蘭蒲啦！」
「哇！咁仲有得剩既！？」
「你知佢幾Kai架啦？一秒就俾D豺狼眈左去！」
「係……係架……」NO!!!!!!!!!!!!!!!!
「喂咁啦！一夜夫妻都百二蚊，賣個人情俾我，幫我睇住佢！」
「下……我……？」
「係得你信得過架乍！幫我睇住佢，等佢過左關左就完成任務！」
「哇……呢D苦力野黎個喎……乜…乜咁益我呀？」
「老兄今日滴水之恩，小弟他日湧泉相報！」
「聽住先啦……唉。」
自那天起，
心裡頭就多了一瓶酒。
一瓶以感情浸泡的醇酒。
這段往事記憶猶新，
今晚，我把這瓶醞釀十年的酒打開，
獨自坐在沙發上，
一邊喝一邊按iPad，
看著她Facebook的照片，流淚。
6. AA制聯誼
那天後，
我開始以個人名義跟 Katrina 聯絡起來，
她是個沒有多少朋友的人，
或許女孩子總以愛情為先，
自跟家勤交往後就斷六親。
然後勤提出分手以後，
他刻意迴避還一臉天真的 Katrina ，
要她獨自過活。
所以，我的出現得如此順理成章。
先從聊電話開始，
得知她的生活狀況、興趣、喜好，
再不定期約她吃飯，
陪她看電影。
她家境不錯，
家住大型私人屋苑，
母親是高級公務員，
還有一個在英倫留學的哥哥。
她雖然性格單純、天真爛漫，
會考也有二十分，
原校直升中六。
除了會彈一點點鋼琴，
就是喜歡迪士尼的卡通人物。
所以十分喜歡閒逛旺角的潮流特區，
搜羅可愛的文具、貼紙、睡衣。(恤衫長褲那一種。)
每逢電影院有卡通電影上畫，
我也會主動提出一同觀賞。
其實只是陪她觀賞。(我本人最怕迪士尼)
聯誼上，
一切活動也是AA制，
其實我是多想全付，
承包她的雪糕球、戲票…
每次結帳又或步入電影院，
她也硬要把錢塞過來，
有次我無奈的說：「唔使啦！」
她一臉天真的問：「點解呀？」
當時，我真不懂回答…
Katrina 問我為何請她看電影，
我真不會答，
因為我們什麼都不是。
唯有把錢送下。
「唔知家勤鐘唔鐘意呢隻手鐲呢？」
「Katrina，其實佢同妳有冇講過D乜既姐？」
「有呀……佢話好攰……想抖下……所以我都同自己講俾D時間佢……。」
「唔……其實呢……」
「唔？」
「唔……冇野喇，凍呀…著多件衫訓呀！」
「唔！拜拜！」
「拜……。」
我看她的背影徐徐步入大廈，
我也乘地鐵再轉巴士回家。
7. 不能說的秘密
「我要黎睇你地比賽呀！」Katrina 在我上課時打來。
「唔好啦…今日決賽…好多人好迫架……」我拿著手提躲在同學身後說。
「我想黎睇家勤呀！」為什麼永遠不是我？
「唔好啦！佢今日做後備，唔出場架！」老師好像有所發現。
「你呃我！佢打波咁叻，點會做後備！」
「乖啦…第二日先同家勤一齊食飯啦好冇？」老師問誰在後面說話。
「我要黎呀！點解唔俾我黎姐！？我靜靜雞黎之嘛！」
「佢女朋友都黎睇呀！！妳係咪要撞到正呀？！」情緒失控，說得很大聲…
「做乜咁大聲鬧人喎！唔黎咪唔黎囉！」她口震震好像要哭。
「我…唔係呀…唉唷！乖啦…不如我地今晚去Hello Kitty Land食飯丫？」
「曹子健，起身！你有冇搞錯，上堂時講電話，仲講到咁大聲，你到底……」
「我俾先生鬧喇…乖啦，最多比完賽我試下拉家勤過黎一齊食飯好冇？」
「唔……」
「答我好啦答我好啦！」
「好啦……你地加油喇……」
「嘻嘻……我會加…」
「曹子健，你企左響身都仲可以講緊電話？」
「咦？妳o個邊打冷鐘喇，快D去上堂啦！我晏D再打俾你…」
「好啦，拜拜……。」
「拜拜。」
掛線後，
當然被老師沒收了電話，
同學們都在笑起來，
笑我犯校規犯得如此不失霸氣。(把名句套入當年)
很快便傳遍整層中七走廊。
都中七了，電話還要家長過來取回，
校園真是一個永遠純情的地方，
老師永遠也是一棵棵長不大的植物。
這部Nokia3210，不打算要了，
就送給這位地理老師算。
下課後，
我跟家勤提著重重的運動包走到西區運動場途中，
他問我是否交了女友，
我說沒有，
他說我撒謊。
事情是，
冒犯老師的威嚴也要把電話對話完結，
為浪漫而挑戰校規和老師尊嚴，
還給同學們以訛傳訛，
說我掛線前還來了一個Goodbye Kiss給對方…
事到如今，
我又怎開口跟他說，
電話中的女生，其實就是他的前女友……？
比賽完結，
我們不敵對手僅以兩分之差敗陣，
大家也沮喪地垂著頭，
唯獨家勤握著女友的手，
風騷的跟我說一句Happy Friday。(女友已不是美國華僑)
而我，就揹著重重的ACG運動袋到銅鑼灣受靶。
「家勤呢？」
「佢唔舒服，番左屋企……。」
「佢…佢冇事丫嘛？！」
「感冒腸入菌姐……」
8. 衝突
「你究竟有冇同 Katrina 講清楚架？」
「講咩姐！都咁耐喇！我仲以為佢已經轉左會添……」
「你知唔知你一句話想抖下，人地等左你兩年呀！」
「咁你咪同佢講話我已經唔鐘意佢囉！」
「呢D野點可以由我呢個第三者講架！」
「唉……等慢慢丟淡啦！我講到咁清楚，咪仲Hurt佢！」
「點解你個人可以咁唔負責任架？」
「情場浪子係咁架啦！女人如衣服，你呢個兄弟都唔明我？」
「我就係當你兄弟先幫你睇住佢！你唔覺你毀緊佢人生？」
「你幫佢搵個男朋友啦咁！介紹銘仔佢識囉！Calvin都唔錯，有錢又靚仔！」
「………你點可以當佢係個波咁傳黎傳去架？」
「做咩姐！你係咪依家要為條女黎話我呀？」
「你真係不可理喻！」
吵得怒火中燒，
為免有更多衝突，
我轉身走了。
離開維多利亞球場，
獨自走到街上亂逛，
橫過天橋，
走到聖保羅中學，
又想起 Katrina 。
雖然她快要去英國留學，
我認識她時，
是穿聖保羅的白恤衫、格仔裙、白鞋子的校服。
想一想，
這是首次確實的肯定，
在這兩年的照顧裡裡，
我已不能自拔的愛上了 Katrina 。
只是，
一來她是我最好朋友的前女友，
在道德上始終有著很大的忌諱；
二來我們的開始就以「姊妹式」相處方式，
整個關係早已被強力噴髮膠固定了，
現在才跟她說，其實一直喜歡她？
我怕連姊妹也沒有得做，
Fuck my life。
No comments:
Post a Comment